Fiyah bineeye waahide usumha Jamiila indaha ihdaachar sana. Wa hi ma tamchi al-lekkool laakin gaaʼide tiʼaawin ammaha fi khidimit al-beet wa tifakkir fi akhuuha wakit ammaha ma fiiha.
Wa Jamiila indaha rafiige waahide usumha Maryam. Wa Maryam di gaaʼide tamchi al- lekkool wa ayyi ma achiiye taji tichiifha le Jamiila wa tihajji leeha be kulla cheyy al-allamooh fi l-lekkool.
Wa Jamiila indaha arbaʼa akhwaan dugaag minha.  Wa humman Yahya wa Zakariiya wa Saafiya wa Markhus al-lissaʼ sakhayyar. Wa Jamiila hi bas tuguchch al-beet wa l-fadaay wa tamchi tichiil almi min al-biir.
Yoom waahid al-amm wa l-abu marago be fajur badri macho al-hille. Al-amm khalbaane, waajib leeha tamchi fi l-markaz al-sihhi (al-labtaan) le mutabaʼat al-khalaba. Wa l-bakaan da baʼiid.
Wa gubbaal ma yamchu, hi gaalat le Jamiila : Guchchi kulla l-beet wa fakkiri le akhuuki. Hu baka tuul al-leel wa hassaʼ hu naayim. Wa kan ligiiti muchkila amchi le amm Maryam wa hi tiʼaawinki.
Yahya faat al-lekkool wa l-akhu al-sakhayyar lissaʼ naayim. Jamiila gaaʼide talʼab maʼa akhwaanha Zakariiya wa Saafiya. Humman chaalo iyeedaat wa addalo leehum iyaal, waahid walad wa waahide bitt. Wa balʼabo bijawwuzu iyaalhum dool. Wa sawwo leehum biyeet be warchaal hana chadar wa bikhannu misil fi l-aruus hana wileed immuhum al-sawwooh fi l-usbuuʼ al-faat.  
Wa Jamiila machat tichiif akhuuha al-sakhayyar kan gamma min al-noom. Hu ma gamma, lissaʼ naayim. Laakin yinchamma afin wa dubbaan lamma foogah.
Wa Jamiila taʼarif kadar al-dubbaan waskhaan wa yagdar yisabbib amraad. Wa hi gaaʼide taturdah be chidde.Markhus sabbab, khulgaanah wassakho lahaddi al-birich al-raagid foogah da kula wassakh.
Jamiila jaat gachgachatah wa barradatah le akhuuha wa labbasatah khulgaan aakhariin nudaaf.
Laakin Markhus ayyaan marra waahid. Hu ma yagdar yugumm.
Wa Jamiila khassalat kulla l-khumaam al-waskhaan be saabuun. Wa awwal wakit akhuuha aafe da, hi tamrug al-huraar be ageegay, laakin hana l-yoom da ma tagdar. Achaan al-huraar da almi wa yinchamma afin bilheen. Wa baʼad khassalat al-khulgaan, Jamiila charcharathum fi l-habil jamb al-beet. 
Wa hi gabbalat tichiif Markhus wa jarrabat tantiih akil laakin hu ma jiiʼaan. Hu atchaan, chirib kulla l-almi al-Jamiila antatah fi l-taasa.
Markhus bigi daʼiif wa gaaʼid yagnit. Jildah wa khachmah kulla yaabsiin. Jamiila tibill leyah wijhah wa iideenah wa baʼad da naam.
Wa Jamiila machat fi l-zereʼ hana ammaha achaan takhdim. Wa wakit mugabbile mallatat leeha khadaar achaan baʼadeen kan ammaha jaat, tirakkibah leehum. 
Al-iyaal gaaʼidiin yalʼabo barra wa hi tasmaahum yadhako. Laakin Jamiila ayyaane gaʼadat jamb akhuuha wa naamat. Wa baʼad chiya bas Markhus gamma wa bada yabki wa hi kula gammat. Markhus batunah toojaah bisabbib wa bigaddif fi kulla l-bakaan, fi l-khulgaan wa fi l-farde wa fi l-birich.
Jamiila gaaʼide tichiif akhuuha taʼabaan wa ma taʼarif tisawwi chunu. Wa ammaha wa abuuha lissaahum ma jo min al-markaz al-sihhi. Khalaas gaalat le akhutha Saafiya : Amchi chiifiiha le amm Maryam. Kan gaaʼide da, guuli leeha taji tichiif akhuuna al-mardaan.
Wa kadar amm Maryam taji da, Jamiila gachgachat al-wileed wa taffaratah be tafiire takhiine wa khassalat iideenha be saabuun. Wa baʼad chiya, Saafiya gabbalat wa maʼaaha Maryam bas achaan ammaha ma fiiha. Laakin hi jaat tichiif kan tagdar tiʼaawinha le Jamiila.
Jamiila hajjat le Maryam wa gaalat : Chiifi Markhus ayyaan be ziyaada. Hu yisabbib wa sabiibah almi akhadar wa afin. Kan khayyart leyah khulgaanah kula illa yisabbib fooghum. Hu ma yaakul laakin yabki yidoor almi bas. Ya Maryam, ana ma naʼarif nisawwi chunu, ammi ma fiiha wa akhuui bilheen mardaan.
Maryam raddat leeha : Al-doora al-faatat fi l-lekkool, al-mudarris hajja leena be marad al-sabiib wa gaal : Wakit al-huraar bigi almi, da bas al-sabiib.
Wa gaal leena battaan : Al-sabiib da marad khatari le l-atfaal. Kan kulla almi jilidhum yikammil, humman yumuutu. Wa le niʼaawunuuhum le yiʼiichu waajib nantuuhum almi yacharbo.  Wa yacharbo almi be ziyaada min al-gaaʼid yamrug min jilidhum. Nantuuhum funjaal waahid hana almi be mileh wa sukkar fi kulli wakit kan humman sabbabo.
Wa Jamiila gaalat : Hassaʼ nisawwu kikkeef le nidaawuuh, kan chokholah sabiib ?
Maryam raddat : Al-mudarris wassafaana kikkeef nisawwu al-charaab hana l-sihha. Khalliini nisawwiih wa inti tichiifiih.
Wa Jamiila saʼalat : Al-charaab hana sihha da chunu ?
Maryam gaalat leeha : Da almi be mileh wa sukkar. Yikhalbutu almi wa mileh wa sukkar wa yiziidu foogah asiir hana leemuun kan fi. Al-charaab hana sihha da bidaawi al-iyaal al-induhum sabiib.
Jamiila gaalat : Sameh, daahu almi hana biir wa mileh wa sukkar wa leemuun.
Maryam gaalat : Khalli nikhassulu iideenah gubbaal. Wa nusubbu almi fi gazaaz liitir waahid wa nidirru al-almi da fi kooro. Wa nusubbu foogah tamaane kiyeer hana sukkar wa nuss kiyeer hana mileh. Wa niʼassuru foogah nuss leemuun wa nikhalbutuuh adiil. Daahu khalaas al-charaab hana sihha jaahiz.
Jamiila gaalat : Sawwiyiinah hayyin. Laakin hu da dawa sameh bas ? Akuun inti sawweeti khalat. Khalli, nikhalluuh yunuum wa baʼadeen yabga leyah chiya akheer.
Maryam gaalat : La, la. Khalli ma nikhalluuh yitawwil. Hu gaaʼid yabga daʼiif be ziyaada wa yabga hafiyaan, maʼanatah almi hana jildah kulla yikammil wa yijiib leyah al-moot. 
Al-gechch yabga yaabis fi l-seef achaan almi ma gaaʼid yusubb. Hu hawjaan almi leechaan yiʼiich wa yakbur. Wa aniina kula misil al-gechch, hawjaaniin almi le niʼiichu. Ma takhaafe, ana mutiʼakiide kadar al-almi hana sihha da yidaawiih. Khalli nantuuh yachrab.
Saafiya hadanat akhuuha giddaamha wa Maryam wa Jamiila gaaʼidiin yantuuh yachrab bicheech bicheech, kiyeer baʼad kiyeer. Wa yuguulu leyah : Achrab wa tabga kabiir wa chadiid misil abba. Wa hu chirib chiya. Wa humman rijo chiya ke wa battaan gaalo leyah : Achrab wa tabga kabiir wa chadiid misil khaalna Yahya. Wa hu chirib chiya. Wa gaalo leyah : Achrab wa tabga kabiir wa chadiid misil immina Gamar. Wa hu chirib battaan.
Wa be sabur katiir humman antooh chirib. Wa humman hajjo leyah hije wa khanno leyah khine wa baazo al-jidaad wa l-kalib. Markhus gariib yikammil almi al-sihha. Wa Jamiila machat raggadatah.
Wa battaan al-beet gaaʼid yinchamma afin. Aywa, battaan sabbab. Jamiila khassalatah wa khayyarat leyah. Laakin batunah gaaʼide toojaah wa hu babki wa hi chaalatah foog wa gaaʼide talʼab maʼaayah.
Wa amm Maryam jaat. Al-iyaal hajjo leeha be kulla cheyy al-hasal wa kikkeef humman anto le l-wileed al-almi hana l-sihha.
Amm Maryam gaalat : Da sameh. Wakit ana macheet al-labtaan le l-fassidiin hana sakhiiri, al-daktooriye wassafat leena kikkeef nisawwu al-almi al-indah mileh wa sukkar. Hi gaalat leena : Al-charaab hana l-sihha hu dawa adiil le l-sabiib. Wakit al-sakhiir yisabbib waajib tantuuh funjaal waahid hana almi al-indah mileh wa sukkar yachrab baʼad kulli sabiib.
Wa amm Maryam zaadat kalaamha wa gaalat : Hassaʼ da, waajib tanti yaakul chiya achaan yiʼaawinah le yidaafiʼ min al-marad. Hassaʼ da namchi nisawwi leyah madiide. Antiih yachrab chiya chiya kan ma jiiʼaan kula. Da cheyy muhimm.
Jamiila hammat achaan ammaha wa abuuha lissaahum ma jo. Hi gaaʼide tisawwi akil le akhwaanha. Hi gaʼadat akalat maʼaahum wa baʼad da machat raggadathum.
Wa Maryam gaalat : Al-leele di ana nagood maʼaaki achaan ammiki ma fiiha. Niʼaawinki nantu al-charaab hana l-sihha le akhuuki al-sakhayyar.
Jamiila wa Maryam fakkaro le Markhus tuul
al-leel. Humman gaʼado jambah wa antooh almi hana al-sihha chirib. Wa antooh al-madiide al-amm Maryam sawwatha wa chirib.
Al-wakit faat wa Jamiila tidoor tunuum. Laakin hi tifakkir tuguul : Ma nagdar nikhalli Markhus yumuut misil al-gechch al-bala almi. Khalaas hi tugumm wa tantiih almi yachrab.
Markhus bigi leyah chiya akheer wa naam adiil. Wa tawwaali simʼo haraka barra, di l-amm wa    l-abu dahaabhum wisilo. Laakin humman ayyaaniin bilheen ma yagdaro yihajju wa kulluhum naamo lahaddi fajur.
Wa be fajur Zakariiya wa Saafiya gammo gubbaal. Wa gaalo : Al-wata asbahat ! Gummu !
Maryam tamchi be taʼkhiir fi l-lekkool. Hi gammat be jari.
Al-abu wa l-amm macho yichuufuuh le Markhus al-lissaʼ naayim. Hu tayyib wa yinaffis adiil wa hu ma mabluul. Humman khallooh naayim.
Khalaas Jamiila jaat le ammaha wa gaalat : Haay  ya ammi. Amis Markhus mirid bilheen gaaʼid yisabbib. Allah yibaarik fi Maryam hatta aawanatni. Aniina sawweena al-charaab hana sihha wa anteenaah le l-wileed chirib tuul al-leel. Wa anteenaah akil kula. Ya ammi, maala akhkharti ke ? Ana khuft bilheen !Wa ammaha raddat leeha : Aniina rijiina tawwalna fi l-markaz al-sihhi (labtaan). Wakit dakhalt le l-daktooriye, al-wakit faat khalaas. Aniina chilna kaar achaan naju ajala, laakin al-derib cheen wa gaaʼidiin najru bicheech bicheech. Wa baʼad jareena chiya ke bas al-rijil hint al-watiir angaddat. Be da ma nagdaro nisawwu cheyy aakhar ille rukhna be rijileena. Da l-sabab al-khallaana ma jiina ajala.
Fi l-lekkool Maryam machat le l-mudarris wa gaalat leyah : Ya sayyidi saamihni ana jiit be taʼkhiir. Albaareh ana aawant rafiigti Jamiila le nidaawu akhuuha al-sakhayyar. Hu yisabbib wa mardaan bilheen. Wa anteena al-charaab hana sihha tuul al-leel wa be fajur da bigi leyah chiya akheer. Laakin albaareh ma numt ajala achaan da bas ma gidirt gammeet badri. 
Wa l-mudarris farhaan bilheen wa gaal :  Da sameh bilheen Maryam. Min fadulki tagdare tifassiri le l-fasul kikkeef yaʼarfu al-sabiib wa kikkeef yidaawuuh.
Maryam katabat fi l-sabbuura :  Al-sabiib hu misil almi wa l-jilid yabga yaabis wa l-uyuun yamchu daakhal wa l-sakhiir yabga daʼiif. 
Wa Maryam fassarat battaan wa gaalat : Aniina sawweena al-charaab hana sihha, misil allamnaah al-usbuuʼ al-faat hini fi l-fasul. Wa anteenaah chirib chiya chiya wa marra katiir. Wa fi ayyi sabiib nantuuh finjaal waahid malyaan wa anteenaah akil kula. Wa fi ayyi sabiib nikhassulu al-wileed wa nikhassulu iideenna kula be saabuun.
Wa l-mudarris gaal : Fiyah daktooriye waahide gariib taji hini fi l-lekkool. Nihajji leeha be gissit Maryam wa Jamiila wa Markhus.
Wa ambaakirtah be fajur al-daktooriye jaat fi l-lekkool wa simʼat al-gisse di. Wa saʼalat : Markhus saakin ween ? Nidoor namchi nichiifah.
Wakit al-daktooriye wisilat bakaan Markhus, al-harraay foog wa l-wata haamiye bilheen. Laakin dubbaan waahid kula ma fiih jamb al-sakhiir. Hu ayyaan laakin batunah ma toojaah. Jamiila gaaʼide talʼab maʼaayah be asaabeyah wa tahasibhum leyah waahid, tineen, talaata, arbaʼa, khamsa. Wa baʼad da hi tikanjirhum leyah waahid baʼad waahid wa Markhus gaaʼid yadhak.
Wa l-daktooriye kachafat Markhus wa chaafat aafiytah katiire. Wa hi chakarat Jamiila wa gaalat : Inti fakkarti be ziyaada fi akhuuki. Wa kan ana kula ma nisawwi ziyaada min da.
Amm Jamiila farhaane be ziyaada. Al-daktooriye gaalat leeha : Inti afrahe ziyaade le bittiki achaan hi najjat akhuuha min al-moot. Kan awwal hi ma antatah al-charaab hana l-sihha, almi hana jildah kulla yikammil. Wa kan dawwartu tiwadduuh fi l-markaz hana sihha kula, tiwassulu be taʼkhiir achaan al-bakaan da baʼiid. Wa humman ma yagdaro yisawwu cheyy le yinajjuuh.
Wa l-daktooriye gaalat battaan : Waajib al-yoom kula tisawwu leyah al-charaab hana l-sihha. Titaabuʼu antiin al-charaab da wa waajib yachrab katiir. Wa antuuh madiide wa akil kula. Ana namchi wa ambaakir naji nichiifah.
Wa fi l-leele di, aayilaat Jamiila naamat adiil. Al-amm gammat marriteen be l-leel achaan tantiih le Markhus yachrab almi hana mileh wa sukkar. Wa khayyarat leyah kula achaan sabbab laakin aafiytah katiire.
Wa ambaakirtah Maryam jaat le tichiif Markhuus wa hi firhit wakit chaafat aafiytah katiire. Wa l-daktooriye kula jaat wa gaalat le Maryam :  Ana farhaane ziyaada beeki. Wakit tabge kabiire, inti kula tabge daktooriye wa tinajji naas aakhariin kula.